Sant Martin de Tours de Gausac Imprimir E-Mail


Vista general de l’exterior de l’església



Era glèisa de Sant Martin de Gausac ei un magnific exemple d’arquitectura gotica, un estil artistic pòc comun ena Val d’Aran. S’articule en ua soleta nau, damb era incorporacion de capèles lateraus e cabeçada per ua absida poligonau.

Maugrat era unitat estilistica dera glèisa de Gausac, òc que se met de manifèst ua seqüencialitat constructiva que semble arringar enes darreries deth sègle XIII o començament deth XIV enquia arribar ena plenitud formau gotica deth sègle XV. Pr’amor dera intervencion efectuada en ostiu der an 2001, se confirmèc era preséncia d’elements constructius pertanhents as darreries deth periòde romanic.

Er eretatge romanic se remèrque en batiader que trapam laguens deth temple. Se tracte d’un vas cilindriforme a on i a esculpit un discurs iconografic parièr ath des batiaderes de Casau e Escunhau. Tanben ei dera epòca romanica er aiguasenhèr que trapam encastrat en interior dera glèisa, a pròp dera pòrta d’entrada; era sua decoracion se base en elements vegetaus –camères e huelhes-, fòrça repetida en batiaderes e aiguanhenhèrs e que tanben trapam enes de  en Mont, Casau, Escunhau, Begós, eca.

Era estructura arquitectonica dera glèisa se ten a base de pilastres de seccion semicilindrica, des d’a on gessen es vòutes de crotzeria que curbissen era bastenda. Era absida, en tot seguir es directritzes formaus deth gotic, ei de configuracion poligonau. Entà acabar, cau destacar eth Crist esculpit que traparam encastrat en un des murs deth nartèx o nèira d’entrada e que poderie procedir deth  timpan dera anteriora glèisa romanica.



Pica baptismal