Sant Pèir d’Escunhau Imprimir E-Mail


Pila bautismau de Sant Pèir d´Escunhau



Es atractius dera glèisa de Sant Pèir d’Escunhau son sustot era portada e eth batiader.


Era portada de Sant Pèir d’Escunhau, er element de mès projeccion artistica dera glèisa, s’estructure a compdar de tres arcs en degradacion e dues arquivòutes sostengudes per colones. En centre deth timpan i é esculpida era figura deth Crist Crucificat, era quau pes sòns trèts, se semble fòrça as des nartèx o nèira de Sant Miquèu de Vielha e Sant Martin de Gausac. Era rèsta dera portalada ei ornada damb diuèrsi elements escultorics: es capitèus, damb representacions antropomorfiques; er escaquièr, recors decoratiu fòrça recorrent enes glèises araneses; e eth lumedan de naut, que corone eth còs arquitectonic dera portada e ei compausat per un crismon entorat per dues rosetes de ueit puntes inscrites coma eth crismon, laguens de cercles.

Eth batiader mòstre esculpit un lenguatge iconografic que l’emparente damb es auti batiaders de Gausac e de Casau. Se tracte d’ua ornamentacion qu’altèrne es motius vegetaus e geometrics damb representacions figuratives; ei de traça fòrça linhau e era sua execucion date des sègles XII e XIII.

Ja laguens deth periòde gotic, n’endonviam era sua influéncia ena estructura interiora dera glèisa cabecèra, sostenguda per nervadures e vòutes de crotzeria; e ena hièstra exteriora, plaçada ena cabeçada deth mur de meddia. Entre es sègles XVII e XVIII s’adòsse ara glèisa era actuau tor campanau.



Detalh d’un capitèu dera portada principau