Mair de Diu dera Purificacion de Bossòst Imprimir E-Mail


Vista exterior dera glèisa a on apareish era tor campanau

 

Era vila de Bossòst, ua des mès dinamiques e coloristes deth Baish Aran, acuelh un magnific exemplar d’arquitectura romanica aranesa, era glèisa dera Mair de Diu dera Purificacion.

Çò de prumèr qu’estone dera sua magnifica arquitectura ei era sua unitat estilistica, que la convertís en un fidèu document visuau dera arquitectura romanica deth sègle xii. Ei atau qu’era Mair de Diu dera Purificacion deven un compèndi des principaus caracteristiques der art romanic, damb era sua planta basilicau, tamb tres absides decorades tamb arquacions e lesenes lombardes.

Era sua tor campanau junhuda ar extrem nòrd-èst, configurada a compdar de 3 pisi, ath dessús d’ua nauta basa, tamb hiestrons e hièstres geminades, desseparades per frisi d’arcades lombardes e lesenes de tipe lombard.

Es sues dues portades, andues estructurades a compdar d’arcs en degradacion e timpan, son d’un gran riquièr iconografic.

Se mos acalam laguens dera glèisa, remercaram eth dessenh estructurau dera arquitectura romanica: fixem-mos enes quate arcades que desseparen es naus e es pilars circulars que la sostien, toti eri hèti de pèira trebalhada e escairada, e coronadi per impòstes lises. Un detalh que non se mos a pas de passar desapercebut ei eth testimòni d’un fragment de pintura murau plaçat ena absida centrau, a on s’intuís era representacion dera scèna dera Epifania; era datacion d’aguestes pintures segontes es darrèrs estudis se placerie ath torn des s. xiv-xv.

 


Detalh d’un crismon