Eth Conselh amie a tèrme naui trabalhs de restauracions patrimoniaus

Es trabalhs de restauracion e consolidacion des coches pictoriques ena glèisa de Sant Ròc de Begós (Lairissa) an permetut de descurbir ua scèna plan remercabla deth sègle XVII, plaçada ath dessús der arc deth presbitèri. Eth conjunt, que date de 1618, segontes cònste inscrit ena superfícia pictorica, represente era scèna dera crucifixion de Jesucrist, qu’apareish en creu, acompanhat, en andús costats, dera vèrge Maria e er apòstou Joan.

Era pintura, de bona factura, ei d’estil renaishentista auançat, segontes a explicat era tecnica de Patrimòni deth Conselh Generau d’Aran, Elisa Ros. Atau ac permet concludir era sua iconografia classica e estatica. Era intervencion s’a amiat a tèrme damb eth supòrt tecnic deth Centre de Restauracion de Béns Mòbles de Sant Cugat.

Eth descurbiment d’aguesta naua scèna, que se hig ath conjunt trobat aguest ostiu ena glèisa d’Unha, tanben d’estil renaishentista en tot representar as sèt virtuts teologaus, hèr a aumentar eth valor artistic dera glèisa de Begós, d’origina romanica, damb ua part importanta d’estil gotic e un retaule barròc, que hèn deth temple un des mès interessants deth parçan. Era actuacion complemente es trabalhs de resolucion des umitats qu’eth Conselh Generau desvolopèc eth passat mes de mai.

Eth conselhèr generau José Antonio Bruna a destacat era importanta labor qu’amie a tèrme eth Conselh entà “méter en lòc que se merite ath patrimòni artistic dera Val d’Aran, coma un des conjunts culturaus e artistics mès importants deth Pirenèu, tant peth sòn valor arquitectonic coma pictoric, que, ath temps, permeten dar valor ath conjunt deth país coma destinacion toristica culturau de referéncia”, atau coma demòstren es darrères trobalhes enes glèises araneses.