Era norma ei promoiguda pera Generalitat damb era collaboracion deth Conselh Generau d’Aran

Ua lei desvoloparà per prumèr còp er emparament der aranés en toti es encastres e sectors entath foment deth sòn emplec, difusion e coneishença. Atau se despren der auantprojècte qu’a elaborat era Generalitat de Catalunya damb era collaboracion deth Conselh Generau d’Aran e qu’a presentat, era setmana passada, eth director deth Programa entara creacion dera Oficina der Occitan en Catalonha, Jusèp Loís Sans, en un acte qu’a agut lòc, ena sedença deth Govèrn aranés, damb eth sindic d’Aran, Francés Boya, e era cap de Cultura e Politica Lingüistica, Maria Vergés.

Era lei, qu’a estat sometuda a informacion publica, promoirà er aranés, regularà er emplec oficiau dera lengua en Catalonha, fomentarà eth sòn usatge en Aran atau coma eth sòn emplec enes mieis de comunicacion. Tanben s’establiràn mecanismes entath finançament dera politica lingüistica.

Eth sindic Francés Boya a manifestat que “gràcies ar Estatut, s’a hèt ua lei que dignifique er aranés” e a confidat ena sua “plea constitucionalitat”. Boya a hiscat a qu’era Generalitat pogue aprovar era lei en 2009 damb er objectiu de dar-li lum vèrda en Parlament abantes qu’acabe era legislatura autonomica.

Eth Sindic a explicat que “ei preferible presentar es esmenes pendent eth periòde de tramitacion parlamentària entà pr’amor d’agilizar eth procès qu’a de perméter dotar-mos dera prumèra lei der aranés”. Per aguest motiu, demore qu’es allegacions qu’a presentat ara eth grop de CDA ath Govèrn catalan “non s’adrecen damb era finalitat de retardar eth procès”. Per contra, eth Govèrn aranés a previst de hèr a arribar es sues allegacions en periòde parlamentari per miei deth grop Socialistes – CpC, deth quau eth Sindic en serà eth sòn pòrtavotz ena comission redactora.